Германската
компанија Трансфермаркт, која се занимава со вредноста на фудбалерите
на глобалниот трансфер-пазар, објави дека Барселона и Челзи во моментов
имаат најскапи состави, односно највредни фудбалери во своите екипи.
Своите податоци компанијата ги базира на реалната вредност на
фудбалерите, а не на откупните клаузули или некои други фактори кои
евентуално би ја зголемиле или намалиле нивната вредност.
На
првото место се наоѓа Челзи на Роман Абрамович, чија екипа е проценета
на 410,2 милиони евра, и тоа најмногу поради Дрогба, Есјен, Лампард и
Тери. И покрај тоа што во екипата има голем број ѕвезди како Меси, Ето,
Чави, Иниеста, Алвес и Анри, Барселона во моментов е само на второто
место со 408,5 милиони евра. Во првата "петорка" на најскапи екипи во
светот доминираат англиските и шпанските бидејќи веднаш зад Челзи и
Барселона се наоѓаат Манчестер Јунајтед и Милан, а единствениот клуб од
Италија во ова друштво е Милан, чија вредност се проценува на 330
милиони евра поради Кака, Роналдињо и Пирло. Градскиот ривал Интер е
веднаш зад "росонерите" со вкупна вредност на фудбалерите од 316
милиони евра.
Сепак, ако се земе просечната вредност на
фудбалерите во овој момент, може да се заклучи дека Барселона, а не
Челзи, има најскап тим во моментов. Во студијата на Трансфермаркт Барса
е вклучена со само 24 фудбалери колку што брои првиот тим, додека кај
Реал Мадрид се 28, кај Челзи 27, а кај Милан дури 30. Тоа значи дека
секој фудбалер на Барселона просечно вреди по 17 милиони евра, на Челзи
15 милиони, на Реал Мадрид 14 милиони, на Милан 11 и на Интер десет
милиони евра.